پان کھا کر سرمہ کی تحریر پھر کھینچی تو کیا

Poetry of Bahadur Shah Zafar

شاعربہادر شاہ ظفر

پان کھا کر سرمہ کی تحریر پھر کھینچی تو کیا
جب مرا خوں ہو چکا شمشیر پھر کھینچی تو کیا

اے مہوس جب کہ زر تیرے نصیبوں میں نہیں
تو نے محنت بھی پئے اکسیر پھر کھینچی تو کیا

گر کھنچے سینہ سے ناوک روح تو قالب سے کھینچ
اے اجل جب کھنچ گیا وہ تیر پھر کھینچی تو کیا

کھینچتا تھا پاؤں میرا پہلے ہی زنجیر سے
اے جنوں تو نے مری زنجیر پھر کھینچی تو کیا

دار ہی پر اس نے کھینچا جب سر بازار عشق
لاش بھی میری پئے تشہیر پھر کھینچی تو کیا

کھینچ اب نالہ کوئی ایسا کہ ہو اس کو اثر
تو نے اے دل آہ پر تاثیر پھر کھینچی تو کیا

چاہیئے اس کا تصور ہی سے نقشہ کھینچنا
دیکھ کر تصویر کو تصویر پھر کھینچی تو کیا

کھینچ لے اول ہی سے دل کی عنان اختیار
تو نے گر اے عاشق دلگیر پھر کھینچی تو کیا

کیا ہوا آگے اٹھائے گر ظفرؔ احسان عقل
اور اگر اب منت تدبیر پھر کھینچی تو کیا

Poet Bahadur Shah Zafar

Paan kha kar surma ki tehreer phir khenchi to kya
Jab mra khoo ho chuka Shamsheer phir khenchi to kya

Ae mehwas jab ke zar tairay naseeboon mein nahi
To ne mehnat bhi piye akseer phir khenchi to kya

Gir khnche seenah se navak rooh to Qalib se khech
Se ajal jab khnch gaya woh teer phir khenchi to kya

Khinchtaa tha paon mera pehlay hi zanjeer se
Ae junoo to ne meri zanjeer phir khenchi to kya

Daar hi par is ne khincha jab sir bazaar ishhq
Laash bhi meri piye tashheer phir khenchi to kya

khech ab naala koi aisa ke ho is ko assar
to ne ae dil aah par taseer phir khenchi to kya

chahiye is ka tasawwur hi se naqsha khenchna
dekh kar tasweer ko tasweer phir khenchi to kya

khech le awwal hi se dil ki annan ikhtiyar
to ne gir ae aashiq dilgeer phir khenchi to kya

Kya sun-hwa agay uthaye Gir ظفرؔ ahsaan aqal
Aur agar ab minnat Tadbeer phir khenchi to kya